काठमाडौं, फागुन ११ । अखिल नेपाल फुटवल सङ्घ (एन्फा) र विगत ११ वर्षदेखि खेलकुद सामग्रीको बिक्री गर्दै आएको रुट्स फेसन प्रालिको एडिडास नेपालबीच दुई वर्षको लागि रु १४ लाखमा सम्झौता भएको छ । विहिबार पत्रकार सम्मेलनमा रुट्स फेसनका व्यवस्थापन निर्देशक सञ्जिव तुलाधर र एन्फा अध्यक्ष गणेश थापाबीच सम्झौता पत्रमा हस्ताक्षर भएको हो ।

सम्झौताअनुरुप फागुन २५ गतेदेखि दशरथ रङ्गशालामा आयोजना हुने एएफसी च्यालेन्ज कप फुटवल प्रतियोगितामा नेपाली राष्ट्रिय टोलीले एडिडास कम्पनीको जर्सी लगाएर खेल्नेछ । सम्झौताअनुसार एडिडासले ४० जोर ट्रयाकसुट राष्ट्रिय टोलीलाई दिनेछ भने ४० जोर ट्रयाकसुट सन् २०१३ मा पनि प्रदान गर्ने छ । यस्तै एन्फालाई २०० जोर राष्ट्रिय जर्सि पनि एडिडासले दिनुपर्ने छ । राष्ट्रिय फुटबल टोलीले प्रयोग गर्ने सबै ट्रयाकसुट, ज्याकेट, फुटवल, जुत्ता, मोजा र ब्याग एडिडास ब्राण्डको मात्र हुनेछ ।